Saturday, 23 May 2015

106.I Give My First Love to You

I Give My First Love to You "Boku no hatsukoi wo kimi ni sasagu" (original title)  (2009) : My love life has a time limit. It's much shorter than others. So i have no time to waste. I have to shine brightly like fireworks in the summer sky.

Language: Japanese
Genre: Romantic Drama
Director: Takehiko Shinjo
Writers: Kotomi Aoki, Kenji Bando
Stars: Mao Inoue, Masaki Okada, Natsuki Harada

ജീവിതത്തില്‍ ഒരിക്കലെങ്കിലും പ്രണയിക്കാത്തവര്‍ ഉണ്ടാവില്ല, ചിലരുടെ പ്രണയം പൂവിട്ടു തളിര്‍ത്ത്‌ എന്നും
അവരോടൊപ്പം ഉണ്ടാകുമ്പോള്‍ ചിലരുടേത് പാതിവഴിയില്‍ കൊഴിഞ്ഞുപോവും എന്നാല്‍ നഷ്ടപ്പെട്ട് പോകും എന്ന്‍ അറിഞ്ഞിട്ടും പ്രണയിച്ചവര്‍ ഉണ്ടാകുമോയെന്ന് സംശയമാണ്... ഇത് അങ്ങനെയുള്ളവരുടെ കഥയാണ് ഒരിക്കല്‍ നഷ്ടപെടും എന്ന്‍ അറിഞ്ഞിട്ടും പരസ്പരം സ്നേഹിച്ചവരുടെ കഥ...

ഇതേ പേരിലുള്ള ജാപ്പനീസ്‌ മാന്ഗാ സീരീസിനെ അസ്പതമാക്കി  Kotomi Aoki സംവിധാനം ചെയ്ത് 2009ല്‍ പുറത്തിറങ്ങിയ ചിത്രമാണ് I Give My First Love to You. ബാല്യത്തിലെ ഹൃദ്‌രോഗിയായ Takumaയുടെയും അവനെ പ്രണയിച്ച Mayuവിന്റെയും കഥയാണ് ചിത്രം പറയുന്നത്...

Takumaയും Mayuവിന്റെയും ബാല്യകാലത്തില്‍ നിന്നുമാണ് ചിത്രം തുടങ്ങുന്നത്... എട്ട് വയസ്സ് മുതല്‍ഇരുവരും അടുത്ത സുഹ്രത്തുക്കളാണ്... ഹൃദ്‌രോഗമുള്ള Takumaയെ ചികിത്സിക്കുന്നത് കാര്‍ഡിയോളജിസ്റ്റായ Mayuവിന്‍റെ അച്ഛന്‍ തന്നെയാണ്... ഒരു ദിവസം Mayuവിന്റെ അച്ഛന്‍ Takumaയുടെ മാതാപിതാക്കളോട് അവന്‍ ഇരുപതുവയസ്സിനപ്പുറം ജീവിക്കില്ല എന്ന്‍പറയുന്നത് ഇരുവരും കേള്‍ക്കനിടയാവുന്നു... എങ്കിലും ഇരുവരുടെയും സൌഹ്രുദം വളരുകയും ഏറെ വൈകാതെ തന്നെ ഇരുവര്‍ക്കുമിടയിലും പ്രണയം പൊട്ടി മുളയ്ക്കുന്നു... തങ്ങള്‍ക്ക് ഇരുപത് വയസ്സ് പൂര്‍ത്തിയാവുമ്പോള്‍ അവളെ വിവാഹം ചെയ്യാമെന്ന് Takuma Mayuവിനു വാക്ക് നല്‍കുന്നു...

കാലം ഏറെ കടന്ന്‍ ഇരുവരും ജൂനിയര്‍ ഹൈസ്കൂളില്‍ എത്തിനില്കുമ്പോഴും ഇരുവരുടെയും മനസ്സില്‍ ആ പ്രണയം ഇപ്പോഴും മാറ്റമൊന്നും സംഭവിക്കാതെ നിലനില്‍ക്കുന്നു... എന്നാല്‍ തനിക്കിനി അധികകാലം ബാക്കി ഇല്ലെന്നും മായുവിനു കൊടുത്ത വാക്ക് പാലിക്കാന്‍ തനിക്കാവില്ല എന്നും മനസിലാക്കുന്ന Takuma അവളില്‍ നിന്നും അകലാന്‍ ശ്രമിക്കുന്നു...

ഒരുപ്പാട്‌ ചിരിപ്പിച്ചു പിന്നീടു ഒരു വിങ്ങല്‍ സമ്മാനിച്ചു അവസാനിക്കുന്ന പ്രണയചിത്രങ്ങള്‍ കൊറിയന്‍ ചിത്രങ്ങളില്‍ എന്നപോലെ ജാപ്പനീസ് ചിത്രങ്ങളിലും ധാരാളമായി കാണാവുന്നതാണ് എന്നാല്‍ അവയില്‍ നിന്നും ഏറെ വെത്യസ്തമാണ് I Give My First Love to You. ചിത്രത്തിന്‍റെ തുടക്കം മുതല്‍ അവസാനം വരെ നിറകണ്ണുകളോടെ മാത്രമേ ഈ ചിത്രം കണ്ടവസാനിപ്പിക്കാന്‍ പ്രേക്ഷകന് സാധിക്കുകയുള്ളൂ... പൊതുവേ ജാപ്പനീസ്‌, കൊറിയന്‍ ചിത്രങ്ങളില്‍ കാണുന്ന ക്ലിഷേ രംഗങ്ങള്‍ പലതും ഇതിലുമുണ്ട് എന്നാല്‍  മികവുറ്റ തിരകഥയും അവതരണമികവും കൊണ്ട് ചിത്രം അതെല്ലാം മറികടക്കുന്നു...

ഹൃദ്‌രോഗ ബാധിതനായ Takuma Kakunouchi യായി Masaki Okadaയും അവനെ  ഒരുപ്പാട്‌ സ്നേഹിച്ച Mayu Tanedaയായി Mao Inoue മികച്ച പ്രകടനം തന്നെ കാഴ്ചവെച്ചിരിക്കുന്നു... മറ്റ് കഥാപാത്രങ്ങളെ അവതരിപ്പിച്ചവരെല്ലാം തന്നെ അവരുടെ വേഷങ്ങള്‍ നന്നായി ചെയ്തിരിക്കുന്നു...

ചുരുക്കത്തില്‍ നമ്മുടെ കണ്ണുകളെയും മനസ്സിനെയും ഈറനണിയിക്കുന്ന മികച്ചൊരു പ്രണയചിത്രമാണ് I Give My First Love to You...

Tuesday, 12 May 2015

105.Uttama Villain

Uttama Villain (2015) : A must watch from theater. 



Language: Tamil
Genre: Dramedy
Director: Ramesh Aravind
Writers: Kamal Haasan, Crazy Mohan
Stars: Kamal Haasan, Dr. K. Viswanath, K. Balachander, Urvashi, Jayaram, Pooja, Andrea Jeremiah

മാതൃഭൂമി ദിനപത്രത്തില്‍ ഈ ചിത്രത്തെക്കുറിച്ച് വന്ന ആര്‍ട്ടിക്കിള്‍ വായിച്ച നിമിഷം മുതല്‍ വലിയൊരു പ്രതീക്ഷ തന്നെ ഉത്തമവില്ലനെ കുറിച്ചെനിക്കുണ്ടായിരുന്നു പിന്നീടെത്തിയ ടീസറുകളും ട്രെയിലറുകളുമെല്ലാം തന്നെ ആ പ്രതീക്ഷകള്‍ നിരത്തുന്നവയായിരുന്നു... സാധാരണ ഇതുപോലെ വലിയ പ്രതീക്ഷ വെച്ച് പുലര്‍ത്തുന്ന ചിത്രങ്ങള്‍ എല്ലാം തന്നെ പൂര്‍ണമായും നിരാശയാണ് സമ്മാനിക്കാറുള്ളത് എന്നാല്‍ ഉത്തമവില്ലന്‍ എന്‍റെ പ്രതീക്ഷകള്‍ക്കുമപ്പുറം മികച്ചു നില്‍ക്കുകയാണ് ചെയ്തത്...

സൂപ്പര്‍സ്റ്റാറായ മനോരഞ്ജന്‍ ചില പ്രത്യേക കാരണങ്ങളാല്‍ താന്‍ ചെയ്യാന്‍ തീരുമാനിച്ചിരുന്ന സിനിമകളെല്ലാം മാറ്റിവെച്ച് തന്‍റെ ഗുരുവായ മാര്‍ഗദര്‍ശിയുമൊത്ത് ഒരു കോമഡി സിനിമ ചെയ്യാന്‍ തീരുമാനിക്കുന്നു... സിനിമാലോകത്തെയും മനോരജന്റെ കുടുംബത്തെയും ഒരുപോലെ ഞെട്ടിച്ച ഒരു വാര്‍ത്തയായിരുന്നു അത്... എന്തിനാണ് മനോരന്ജന്‍ ഇങ്ങനെയൊരു തീരുമാനം എടുത്തത്, എന്താണ് അയാള്‍ ഇനി ചെയ്യാന്‍ പോകുന്നത് ഇതെല്ലാമാണ് ബാക്കി കഥ പറയുന്നത്...

SPOILERS ALERT

കഴിഞ്ഞ കുറച്ചു വര്‍ഷങ്ങള്‍ക്കിടയില്‍ കമല്‍ഹാസ്സന്‍ എന്ന അതുല്യപ്രതിഭയില്‍ നിന്നും പ്രേക്ഷകര്‍ക്ക് ലഭിച്ച ഏറ്റവും മികച്ച ചിത്രമാണ് ഉത്തമവില്ലന്‍... മരണം കാത്ത് കഴിയുന്ന മനോരഞ്ജന്‍റെയും, മരണത്തെ അതിജീവിച്ച ഉത്തമന്റെയും കഥകളിലൂടെ എന്നെന്നും മനസ്സില്‍ സൂക്ഷിക്കാവുന്ന അതിമാനോഹരമായയൊരു ചലച്ചിത്രാനുഭവമാണ് കമലഹാസ്സന്‍ പ്രേക്ഷകര്‍ക്ക് സമ്മാനിക്കുന്നത്...

കമലഹാസന്‍ എന്ന പ്രതിഭ ഉത്തമവില്ലനിലൂടെ പറയാന്‍ ശ്രമിച്ചകാര്യങ്ങള്‍എന്‍റെകാഴ്ചപ്പാടില്‍ ഇങ്ങനെയാണ്... 

ആദ്യം നമുക്ക് ഉത്തമനെ കുറിച്ചു ചിന്തിക്കാം...

ഉത്തമന്‍ പലപ്പോഴും മരണത്തെ കണ്മുന്നില്‍ കണ്ടെങ്കിലും ആ സന്ദര്‍ഭങ്ങളില്‍ നിന്നെല്ലാം അത്ഭുതകരമായി അയാള്‍ രക്ഷപെടുന്നു ഇത് മരണമില്ലത്തവന്‍ എന്ന ഖ്യാതി അയാള്‍ക്ക് സമുഹത്തില്‍ നേടി കൊടുക്കുന്നു... അയാളെ പറ്റി പല കഥകളും നാട്ടില്‍ പ്രചരിക്കുന്നു തുടര്‍ന്ന്‍ അത്യാഗ്രഹിയായ മുത്തരസ്സന്‍ ഉത്തമനില്‍ നിന്നും മരണത്തെ ഇല്ലാതാക്കാനുള്ള മന്ത്രം മനസിലാക്കി താന്‍ വൈകാതെ മരണപെടും എന്ന ജ്യോത്സ്യന്മാരുടെ പ്രവചനത്തെ അസത്യമാക്കുവാന്‍ ശ്രമിക്കുന്നു, മരണത്തില്‍ നിന്നും ഒളിച്ചോടാന്‍ ആണ് അയാള്‍ ശ്രമിക്കുന്നത്... എന്നാല്‍ മരണം ഒടുവിലെ അയാളെ കീഴ്പെടുത്തുക തന്നെ ചെയ്യുന്നു...

ഇവിടെ മരണത്തില്‍ നിന്നും രക്ഷപെടാന്‍ ശ്രമിക്കുന്ന മുത്തരസ്സനില്‍ നിന്നും പലതവണ മരണത്തില്‍ നിന്നും രക്ഷപെട്ട ഉത്തമനെയും നോക്കുമ്പോള്‍ നമുക്കൊരു പ്രപഞ്ച സത്യം മനസിലാക്കാം...

"മരണത്തെ ആര്‍ക്കും തോല്‍പ്പിക്കാനാവില്ല വരേണ്ട സമയത്ത് അത്  നമ്മെ തേടി എത്തുക തന്നെ ചെയ്യും"

ഉത്തമനെ സംഭന്ധിച്ചിടത്തോളം അയാള്‍ക്ക് ഇനിയും ജീവിതം ബാക്കി ഉണ്ടായിരുന്നു അതിനാല്‍ താന്‍ ചെന്ന്‍ പെട്ട അപകടങ്ങളില്‍ നിന്നുമെല്ലാം അയാള്‍ രക്ഷപെടുന്നു എന്നാല്‍ മുത്തരസ്സനെ സംഭന്ധിച്ചിടത്തോളം മരണം അയാളെ തേടി എത്തി കഴിഞ്ഞിരുന്നു അതിനെ അതി ജീവിക്കാന്‍ അയാള്‍ ശ്രമിച്ചുവെങ്കിലും ഒടുവില്‍ മരണം  അയാളെ കീഴ്പ്പെടുത്തുന്നു...

ഇനി നമുക്ക് മനോരഞ്ജനിലേക്ക് വരാം...

മരണം തന്നെ തേടി എത്തി കഴിഞ്ഞു എന്ന്‍ തിരിച്ചറിയുന്ന അയാള്‍ അതില്‍ നിന്നും ഒളിച്ചോടാന്‍ ശ്രമിക്കുന്നില്ല പകരം തനിക്ക് ബാക്കിയുള്ള സമയം ജീവിതത്തോട് പൊരുതാനും കൊണ്ട് തനിക്ക് നഷ്ടപെട്ട പലതും തിരിച്ചു പിടിക്കാനുമാണ് അയാള്‍ ശ്രമികുന്നത്, തനിക്ക് ബാക്കിയുള്ള സമയം വളരെ വിലപ്പെട്ടതാക്കി മാറ്റാന്‍ അയാള്‍ ശ്രമിക്കുന്നു...

കലാകാരന്മാര്‍ക്ക് മരണമില്ല എന്ന്‍ പറയാറുണ്ട് അവര്‍സമുഹത്തിന് സമ്മാനിച്ച മികവുറ്റ സംഭാവനകളിലൂടെ അവര്‍ എന്നും ജീവിക്കും ഇവിടെ മനോരഞ്ജന്‍ കൈവരിക്കുന്നതും അത് തന്നെയാണ് മരണം ചിലപ്പോള്‍ അയാളെ ഈ ഭുമിയില്‍ നിന്നും കൊണ്ടുപോയേക്കാം എന്നാല്‍ അയാളെ സ്നേഹിക്കുന്ന ആയിരകണക്കിന് ജനങ്ങളുടെയും ചെയ്തു വെച്ച മികവുറ്റ കഥാപാത്രങ്ങളിലൂടെയും ചിരഞ്ജീവിയായി അയാള്‍ ഈ ഭുമിയില്‍ ജീവിക്കും. ഒരുതരത്തില്‍ മനോരഞ്ജന്‍ ഇവിടെ മരണത്തെ തോല്‍പ്പിക്കുകയല്ലേ ?

മനുഷ്യന്‍റെ പൊരുതാനുള്ള കഴിവും അവന്‍റെ പ്രതീക്ഷകളെയും സ്വപ്നങ്ങളെയും മനോരഞ്ജനില്‍ നമുക്ക് കാണാം...

ഇത്രയും മികച്ചൊരു തിരകഥയെ വളരെ മികച്ച രീതിയില്‍ അണിയിച്ചൊരുക്കാന്‍ രമേഷ് അരവിന്ദിനും സാധിച്ചിരിക്കുന്നു...

മികച്ച അഭിനയപ്രകടന്നങ്ങള്‍ കൊണ്ടും സമ്പന്നമാണ് ഉത്തമവില്ലന്‍... കമല്‍, ഉര്‍വശി, പാര്‍വതി, എം സ് ഭാസ്ക്കര്‍, ജയറാം, കെ വിശ്വനാഥ്, ആന്ട്രിയ തുടങ്ങിയവര്‍ എല്ലാം തന്നെ  എന്നത്തേയും പോലെ തന്‍റെ വേഷങ്ങളില്‍ തകര്‍ത്താടിയിരിക്കുന്നു. എന്നാല്‍ കെ ബാലചന്ദര്‍ എന്ന മഹാപ്രതിഭയുടെ പ്രകടനമാണ് എന്നിലെ പ്രേക്ഷകനെ കൂടുതല്‍ ആകര്‍ഷിച്ചത് താന്‍ ആദ്യമായും അവസാനമായും അഭിനയിച്ച മാര്‍ഗധര്‍ശി എന്ന സംവിധായകനായി ജീവിക്കുകയായിരുന്നു അദ്ദേഹം... മനോരഞ്ജനെയും, മാര്‍ഗധര്ശിയേയും കാണുമ്പോള്‍ പലപ്പോഴും മനസ്സില്‍ തോന്നി ഇത് കമലിന്റെയും - അദ്ദേഹത്തിന്റെയും ജീവിതമാണോ പറയുന്നത് എന്ന്‍...

എടുത്ത് പറയേണ്ട മറ്റൊരു പ്രകടനം പൂജ കുമാറിന്‍റെതാണ് കര്‍പഗവല്ലിയായി തന്‍റെ ഇതുവരെയുള്ള കരിയറിലെ ഏറ്റവും മികച്ച പ്രകടനമാണ് അവര്‍ കാഴ്ചവെച്ചിരിക്കുന്നത്...

മറ്റൊന്ന്‍  M. Ghibranന്‍റെ പശ്ചാത്തല സംഗീതവും ഗാനങ്ങളുമാണ് ഉത്തമവില്ലനെ കൂടുതല്‍ മികവുറ്റതാക്കുന്നതില്‍ വളരെ വലിയൊരു പങ്ക് തന്നെ ഈ ഗാനങ്ങള്‍ക്കുണ്ട്...

ചുരുക്കത്തില്‍ തീര്‍ച്ചയായും കണ്ടിരിക്കേണ്ട ഒരു ചിത്രം തന്നെയാണ് ഉത്തമവില്ലന്‍.

ഞാന്‍ ഏറ്റവുമധികം ഇഷ്ടപെടുന്ന കമല്‍ ചിത്രങ്ങളില്‍ ഇനി മുന്‍നിരയില്‍ ഉത്തമവില്ലനും ഉണ്ടാകും...

Monday, 20 April 2015

104.Jeeva

Jeeva (2014) : A beautiful sport movie from tamil industry.



Language: Tamil
Genre: Drama, Sports
Director: Susindran
Writers: Santhosh, Susindran
Stars: Vishnu Vishal, Sri Divya, Lakshman Narayan

ചെറുപ്പത്തിലെ അമ്മ നഷ്ടപെട്ട ജീവയുടെ മനസ്സ് നിറയെ ക്രിക്കറ്റ്‌ മാത്രമായിരുന്നു... ഇന്ത്യന്‍ ക്രിക്കറ്റ്‌ ടീമിന്‍റെ ഭാഗമായിത്തീരുക എന്നതായിരുന്നു അവന്‍റെ ഏറ്റവും വലിയ സ്വപ്നം എന്നാല്‍ അത് അത്ര എളുപ്പമായിരുന്നില്ല; തന്‍റെ പ്രണയവും ക്രിക്കറ്റിലെ നെറികെട്ട രാഷ്ട്രിയവുമെല്ലാം അവനു വെല്ലുവിളികളായിരുന്നു...

വിഷയം ക്രിക്കറ്റ്‌ ആണെങ്കിലും പൂര്‍ണമായും ക്രിക്കറ്റിനെ മാത്രം കേന്ദ്രികരിച്ചുള്ള ഒരു ചിത്രമല്ല ജീവ.  ഇത് ജീവയുടെ കഥയാണ്, ബാല്യത്തില്‍ സച്ചിന്‍ ടെണ്ടുല്‍ക്കര്‍ ഇന്ത്യയ്ക്ക് വേണ്ടി  കളിക്കുന്നത് കണ്ട് അദ്ദേഹത്തെ പോലെ ആവാന്‍ ആഗ്രഹിച്ച അവന്‍റെ ബാല്യം മുതല്‍ യൗവനം വരെയുള്ള ജീവിതത്തിലുടെയാണ് ചിത്രം കടന്ന്‍ പോകുന്നത്...  ഈ കാലയളവിനുള്ളില്‍ അവന്‍റെ ജീവിതത്തിലേക്ക് കടന്നുവന്ന പ്രണയവും, സൗഹ്രദവുമെല്ലാം വളരെമാനോഹരമായി ചിത്രത്തില്‍ അവതരിപ്പിച്ചിരിക്കുന്നു...

കഴിഞ്ഞ വര്‍ഷം ഇറങ്ങിയ മികച്ച തമിഴ് ചിത്രങ്ങളില്‍ ഒന്ന്‍ തന്നെയാണ് ജീവ. ഒരു മികച്ച ഫീല്‍ ഗുഡ് മൂവി എന്ന്‍ നമുക്ക് ഈ ചിത്രത്തെ വിശേഷിപ്പിക്കാം... ജീവ എന്ന യുവാവിന്‍റെ ജീവിതത്തെ വളരെ മനോഹരമായി  സംവിധായകന്‍  സുസീന്ത്രന്‍ അണിയിച്ചൊരുക്കിയിരിക്കുന്നു... ക്രിക്കറ്റില്‍ നിറഞ്ഞു നില്‍ക്കുന്ന നെറികെട്ട രാഷ്ട്രിയ ഇടപെടലുകളെ തുറന്ന്‍ കാണിച്ചിരിക്കുന്നു എന്നതാണ് ചിത്രത്തിന്‍റെ ഏറ്റവും വലിയ പ്രത്യേകതകളില്‍ ഒന്ന്‍... പൂര്‍ണമായി അല്ലെങ്കില്‍ കൂടിയും ഏറെ കുറെ  യഥാര്‍ത്ഥനിരൂപിതമായി തന്നെയാണ് സുസീന്ത്രന്‍ ജീവ ഒരുക്കിയിട്ടുള്ളത്...

Vennila Kabadi Kuzhu, Neerparavai തുടങ്ങിയ ചിത്രങ്ങളില്‍ മികച്ച പ്രകടനം കാഴ്ച വെച്ച  വിഷ്ണുവാണ് ജീവയായി അഭിനയിച്ചിരിക്കുന്നത്... വളരെ മികച്ച പ്രകടനം തന്നെയാണ് വളര്‍ന്നു വരുന്ന ഈ നടന്‍ ഈ ചിത്രത്തിലും കാഴ്ചവെച്ചിട്ടുള്ളത്‌... ജീവയുടെ പ്രണയിനിയായി ശ്രീ ദിവ്യയാണ് പ്രേക്ഷകര്‍ക്ക് മുന്‍പിലെത്തുന്നത് ഒരുപക്ഷെ അവരുടെ കരിയറിലെ ഇതുവരെയുള്ള ഏറ്റവും മികച്ച പ്രകടനം ഈ ചിത്രത്തിലേത് ആയിരിക്കും... എടുത്ത് പറയേണ്ട മറ്റ് പ്രകടനങ്ങള്‍ ജീവയുടെ അച്ഛനായി അഭിനയിച്ച മാരിമുത്തു, അതുപോലെ ജീവയുടെ ഉറ്റ സുഹ്രത്തായ രഞ്ജിത്തിനെ അവതരിപ്പിച്ച ലക്ഷ്മണ്‍ നാരായണ്‍ എന്നിവരുടെ പ്രകടനങ്ങളാണ്... മനസ്സിനെ വല്ലാതെ സ്പര്‍ശിക്കുന്നതായിരുന്നു ഇരുവരുടെയും പ്രകടന്നങ്ങള്‍... ഇനിയും മികച്ച വേഷങ്ങള്‍ ഇവരെ തെടിയെത്തട്ടെ എന്നാശംസിക്കുന്നു...

എടുത്ത് പറയേണ്ട മറ്റൊന്ന്‍ ഡി ഇമ്മന്റെ ഗാന്നങ്ങളും, പശ്ചാത്തലസംഗീതവുമാണ്...ചിത്രത്തിലുടനീളം മികച്ചൊരു അനുഭൂതി നിലനിര്‍ത്താന്‍ അദ്ദേഹത്തിന്റെ ഗാനങ്ങള്‍ക്കും പശ്ചാത്തലം സംഗീതത്തിനും സാധിച്ചിട്ടുണ്ട്...

ആര്‍ മാധിയുടെ ഛായാഗ്രഹണം, ആന്റണിയുടെ എഡിറ്റിംഗ് എന്നിവയും മികവു പുലര്‍ത്തുന്നതായിരുന്നു...

ചുരുക്കത്തില്‍ മികച്ച സ്പോര്‍ട്സ് ചിത്രങ്ങളും, ഫീല്‍ ഗുഡ് ചിത്രങ്ങളും കാണാന്‍ ആഗ്രഹിക്കുന്നവരാണ് നിങ്ങളെങ്കില്‍ ഈ ചിത്രം ഒരിക്കലും കാണാതെ പോവരുത്...

Monday, 6 April 2015

103.Njan Steve Lopez

Njan Steve Lopez (2014) : നിഷ്കളങ്കതയുടെ നഷ്ടബോധമാണ് കലാപത്തിന്റെ കാതൽ.


Language: Malayalam
Genre: Thriller, Drama
Director: Rajeev Ravi
Writers: Ajithkumar, Santhosh Echikkanam
Stars: Farhaan Faasil, Ahaana Krishna, Alancier 

തിയറ്ററില്‍ നിന്നും കാണണമെന്ന് വളരെയധികം ആഗ്രഹിച്ചിട്ടും കാണാന്‍ സാധിക്കാതെ പോയ ചിത്രമായിരുന്നു Njan Steve Lopez എന്നാല്‍ കുറച്ചു ദിവസങ്ങള്‍ക്ക് മുന്‍പ് തികച്ചും യാദിര്‍ശ്ചികമായി കോഴിക്കോട് NIT ക്യാമ്പസില്‍ വെച്ച് ഈ ചിത്രം കാണാന്‍ അവസരം ലഭിക്കുകയുണ്ടായി...

റിയലിസ്റ്റിക് ചിത്രങ്ങള്‍ അപൂര്‍വമായി മാത്രം സംഭവിക്കുന്ന മലയാള സിനിമയ്ക്ക് കിട്ടിയ വളരെ മികച്ചൊരു ചിത്രമാണ്‌ ഞാന്‍ സ്റ്റിവ് ലോപ്പസ്...

സ്റ്റിവ് എന്ന യുവാവിന്‍റെ ജീവിതത്തില്‍ അപ്രതീക്ഷിതമായി ഉണ്ടാകുന്ന സംഭവത്തെയും അതിനെ തുടര്‍ന്ന്‍ ഉണ്ടാകുന്ന സംഭവ വികാസങ്ങളിലുടെയുമാണ് ചിത്രം പുരോഗമിക്കുന്നത്...

ഒരു മികച്ച റിയലിസ്റ്റിക് ത്രില്ലെര്‍ എന്ന്‍ നിസംശയം ഈ ചിത്രത്തെ നമുക്ക് വിശേഷിപ്പിക്കാം... അത്ര മനോഹരമായിട്ടാണ് സംവിധായകനായ രാജീവ്‌ രവി ഈ ചിത്രം അണിയിചൊരുക്കിയിട്ടുള്ളത്... ഓരോ രംഗവും ഒന്നിനൊന്ന്‍ മികവുറ്റതായിരുന്നു...

നമുക്ക് പരിചിതമായ കഥാപാത്രങ്ങളും, സമൂഹത്തില്‍ നാം കണ്ടു വരുന്ന സന്ദര്‍ഭങ്ങളും, Shahbaz Aman     Chandran Veyattummal എന്നിവരുടെ  മനസ്സിനെ സ്പര്‍ശിക്കുന്ന ഗാനങ്ങളും,  പശ്ചാത്തല സംഗീതവും,പപ്പുവിന്റെ
  ഛായാഗ്രഹണവും എല്ലാം ഈ ചിത്രത്തെ കൂടുതല്‍ മികവുറ്റതാക്കുന്നു...

പ്രധാന കഥാപാത്രങ്ങളെ അവതരിപ്പിച്ചവര്‍ എല്ലാം തന്നെ പുതുമുഖങ്ങള്‍ ആയിരുന്നെങ്കിലും തങ്ങളുടെ കഥാപാത്രങ്ങളെ മോശമാക്കാതെ അവതരിപ്പിക്കാന്‍ അവര്‍ക്ക് സാധിച്ചിട്ടുണ്ട്

എല്ലാവര്‍ക്കും ഒരുപോലെ ഈ ചിത്രത്തെ ഉള്‍കൊള്ളാന്‍ സാധിച്ചു എന്ന്‍ വരില്ല റിയലിസ്റ്റിക് ചിത്രങ്ങള്‍ എന്നും അങ്ങനെ തന്നെ ആണല്ലോ ? യാഥാര്‍ത്ഥ്യത്തെ സിനിമയില്‍ ആയാലും അംഗീകരിക്കാന്‍ പലര്‍ക്കും മടിയാണ്...

അതുകൊണ്ട് തന്നെയാവാം തിയറ്ററുകളില്‍ അധികം ചലനം സൃഷ്ട്ടികാന്‍ ഈ ചിത്രത്തിനു സാധിക്കാതെ വന്നതും...

Saturday, 21 March 2015

102.100 Days Of Love

100 Days Of Love (2015) : A Sweet Romantic Movie.


Language: Malayalam
Genre: Romance
Director: Jenuse Mohammed
Writer: Jenuse Mohemmed
Stars: Nithya Menon, Sekhar Menon, Dulquer Salmaan

പ്രണയ ചിത്രങ്ങള്‍ എനിക്കെന്നും പ്രിയപ്പെട്ടതാണ് അത് കൊണ്ട് തന്നെയാണ് നാവാഗതനായ ജെനൂസ് അണിയിച്ചൊരുക്കി,  ഉസ്താദ്‌ ഹോട്ടലിനു ശേഷം ദുല്‍ഖര്‍ സല്‍മാനും നിത്യാ മേനോനും താരജോഡികളായി എത്തിയ 100 ഡേയ്സ് ഓഫ് ലവ്  ആദ്യ ദിനം തന്നെ കാണാന്‍ തീരുമാനിച്ചത്... 

തന്‍റെ ഉറ്റ സുഹ്രത്തായ ഉമ്മറിനൊപ്പം ബാംഗ്ലൂര്‍ നഗരത്തില്‍ തീര്‍ത്തും അലസമായൊരു ജീവിതം നയിക്കുന്ന  B K N  എന്ന് അറിയപ്പെടുന്ന ബാലന്‍ എന്ന യുവാവിന്‍റെ ജീവിതത്തിലേക്ക് തികച്ചും അപ്രതീക്ഷിതമായാണ് അവള്‍ കടന്നു വന്നത്... ലക്ഷ്യ ബോധമില്ലാതെ അലസമായി നിന്നിരുന്ന അവന്‍റെ ജീവിതത്തിനു പുതിയൊരു മുഖം തന്നെ അവള്‍ സമ്മാനിച്ചു...

തന്‍റെ പ്രണയിനിയെ തേടിയുള്ള ബാലന്റെയും സുഹ്രത്ത്‌ ഉമ്മറിന്റെയും  യാത്രയുടെ  വളരെ രസകരമായ നിമിഷങ്ങളിലൂടെ ആദ്യ പകുതി വളരെ പെട്ടന്ന്‍ തന്നെ കടന്നുപോകുന്നു...

പിന്നീടു എത്തിയ രണ്ടാം പകുതി ബാലന്റെയും അവന്‍റെ പ്രണയിനിയുടെയും ഇണക്കങ്ങളെയും പിണക്കങ്ങളെയും, അവരുടെ സൗഹ്രദത്തിന്റെയും കഥ   പുതുമയാര്‍ന്ന അവതരണത്തിലൂടെ പറഞ്ഞുകൊണ്ട് ചിത്രം മുന്നേറുന്നു...

പ്രണയം അന്നും ഇന്നും എന്നും പൈങ്കിളിയാണ് അത് എത്ര മനോഹരമായി സ്ക്രീനില്‍ അവതരിപ്പിക്കുന്നു എന്നതിലാണ് പ്രണയ ചിത്രങ്ങളുടെ വിജയം ഒളിഞ്ഞിരിക്കുന്നത്... ഈ കാര്യത്തില്‍ നൂറു ശതമാനം വിജയിക്കാന്‍  സംവിധയാകനായ ജെനൂസിനു സാധിച്ചിട്ടുണ്ട്... പ്രണയത്തിനൊപ്പം വളരെ നല്ലൊരു സൗഹൃദത്തിന്റെയും കഥ പറയാന്‍ ചിത്രത്തിന്‍റെ തിരകഥാകൃത്തു കൂടിയായ ജെനൂസിനു സാധിച്ചിട്ടുണ്ട് അതുപോലെ യുവ തലമുറയുടെ സോഷ്യല്‍ മീഡിയ അടിമത്തത്തെക്കുറിച്ചും ചിത്രം പ്രതിപാതിക്കുന്നുണ്ട്... കഥാപാത്രങ്ങളുടെ രസകരമായ നാമത്തില്‍ തുടങ്ങി ചിത്രത്തിന്‍റെ എല്ലാ മേഘലകളിലും പുതുമ കൊണ്ടുവരാന്‍ ജേനൂസിനു സാധിച്ചിരിക്കുന്നു...

M.R.വിബിന്‍ , സുഹൈല്‍ ഇബ്രാഹിം എന്നിവരുടെ സംഭാഷണവും, പ്രതീഷ് വര്‍മയുടെ മനോഹരമായ ഫ്രെയ്മുകളും, ബിജിപാലിന്‍റെ  പശ്ചാത്തല സംഗീതവും ചിത്രത്തിന്‍റെ വിജയത്തില്‍ വലിയൊരു പങ്ക് തന്നെ വഹിച്ചിട്ടുണ്ട്...

ഗോവിന്ദ്‌ മേനോന്‍ ഒരുക്കിയ ഗാന്നങ്ങളില്‍ ഹൃദയത്തിന്‍ നിറമായി, പ്രണയത്തിന്‍ ധളമായി എന്ന ഗാനം വളരെ മനോഹരമായിരുന്നു ഈ ഗാനം വളരെയധികം ഭംഗിയായി തന്നെ ദ്രിശ്യവല്‍ക്കരികയും ചെയ്തിട്ടുണ്ട്... മറ്റ് ഗാനങ്ങള്‍ എല്ലാം തന്നെ ശരാശരിയില്‍ ഒതുങ്ങി...

ദുല്‍ഖറും നിത്യയും തങ്ങളുടെ കഥാപാത്രങ്ങളെ വളരെ മനോഹരമാക്കിയിട്ടുണ്ട് ഇവര്‍ ഒന്നിക്കുന്ന മണിരത്നം ചിത്രമായ്‌ ഓക്കേ കണ്മണി എന്ന ചിത്രത്തിലുള്ള പ്രതീക്ഷകള്‍ ഉയര്‍ത്തുന്നതാണ് ഈ ചിത്രത്തിലെ ഇരുവരുടെയും പ്രകടനം...

എന്നാല്‍ ചിത്രത്തില്‍ എന്നെ ഏറെ ആകര്‍ഷിച്ചത് ഉമ്മറിനെ അവതരിപ്പിച്ച ശേഖര്‍ മേനോന്‍റെ പ്രകടനമായിരുന്നു ആ കഥാപാത്രത്തിന് ഏറ്റവും അനുയോജ്യമായ പ്രകടനം തന്നെ കാഴ്ച വെക്കാന്‍ അദ്ദേഹത്തിന് സാധിച്ചിട്ടുണ്ട്...

രാഹുല്‍ മാധവ്,ജേക്കബ്‌ ഗ്രിഗറി, പ്രവീണ, അഭിരാമി എന്നിവരും തങ്ങളുടെ ഭാഗങ്ങള്‍ മികച്ചതാക്കി വിനീതിന്‍റെ അച്ഛന്‍ വേഷം പുതുമ നല്‍കി എങ്കിലും അദ്ദേഹത്തെ ഇപ്പോഴും അത്തരം റോളുകളില്‍ സങ്കല്‍പ്പിക്കാന്‍ തോന്നുന്നില്ല...

ചുരുക്കത്തില്‍ കുടുംബ പ്രേക്ഷകര്‍ക്കും യുവാക്കള്‍ക്കും ഒരുപോലെ ആസ്വദിക്കാവുന്ന ഒരു നല്ല പ്രണയ ചിത്രം തന്നെയാണ് 100 ഡേയ്സ് ഓഫ് ലവ്...

Saturday, 14 March 2015

101.Nh10

Nh10 (2015) : Will take your breath away...


Language: Hindi
Genre: Crime Thriller
Director: Navdeep Singh
Writer: Sudip Sharma
Stars: Neil Bhoopalam, Ravi Jhankal, Darshan Kumaar

തുടക്കം മുതല്‍ അവസാനം വരെ പ്രേക്ഷകരെ ഒന്നടഘം ആകാംഷയുടെയും ഭീതിയുടെയും മുള്‍മുനയില്‍ നിര്‍ത്തുന്ന  കൊറിയന്‍ ത്രില്ലര്‍ ചിത്രങ്ങള്‍ കാണുമ്പോള്‍ പലപ്പോഴും ആഗ്രഹിച്ചിട്ടുണ്ട് അത്തരം ചിത്രങ്ങള്‍ നമ്മുടെ ഇന്ത്യന്‍ സിനിമയില്‍ ഒന്ന്‍ വന്നിരുന്നെങ്കിലെന്ന്‍ എന്നാല്‍ കഴിഞ്ഞ ദിവസം തികച്ചും അപ്രതീക്ഷിതമായി കാണാനിടയായ NH10 എന്ന ബോളിവുഡ് ചിത്രംഎന്നെ അക്ഷരാര്‍ത്ഥത്തില്‍ ഞെട്ടിച്ചു കളഞ്ഞു, ഒരു Edge Of Your Seat Thriller എന്ന്‍ നിസംശയം നമുക്ക് ഈ ചിത്രത്തെ വിശേഷിപ്പിക്കാവുന്നതാണ്...

അര്‍ജുനും  ഭാര്യ മീരയും Gurgaonlല്‍ സന്തോഷകരമായ ഒരു ജീവിതം നയിച്ചുവരികയാണ്‌... ഒരു ദിവസം രാത്രി ഏറെ വൈകി ഒരു പാര്‍ട്ടിയില്‍ നിന്നും മടങ്ങുന്നതിനിടയില്‍ മീര അപരിചിതരായ കുറച്ചുപേരാല്‍ ആക്രമിക്കപ്പെടുന്നു അവരില്‍ നിന്നും രക്ഷപ്പെടാന്‍ മീരയ്ക്ക് സാധിച്ചുവെങ്കിലും മാനസികമായി ആ സംഭവം അവളെ തളര്‍ത്തുകയുണ്ടായി... അപകടസമയത്ത് മീരയ്ക്കൊപ്പം ഉണ്ടാവാന്‍ സാധിക്കാത്തതില്‍ സ്വയം കുറ്റപ്പെടുത്തുന്ന അര്‍ജുന്‍ അതിനു പകരമായി മീരയേം കൂട്ടി ഒരു യാത്ര പോകാന്‍ തീരുമാനിക്കുന്നു എന്നാല്‍ അവരറിഞ്ഞില്ല ആ യാത്ര അവരുടെ ജീവിതത്തെ തന്നെ മാറ്റി മറിച്ചു കളയുമെന്ന്...

തുടര്‍ന്ന്‍ മീരയുടെയും അര്‍ജുന്റെയും ജീവിതത്തില്‍ സംഭവിക്കുന്ന തികച്ചും അപ്രതീക്ഷിത സംഭവത്തിലൂടെയും ആ സംഭവം അവരുടെ ജീവിതത്തെ എങ്ങനെയാണ് മാറ്റി മറിക്കുന്നത് എന്നുമാണ് പിന്നീടുള്ള ചിത്രം പറയുന്നത്...

തുടക്കം മുതല്‍ ഉദ്വെഗജനകമായ സന്ദര്‍ഭങ്ങളിളുടെ കടന്ന്‍ പോകുന്ന ചിത്രം ഉടനീളം  പ്രേക്ഷകനെ ആകാംഷയുടെ മുള്‍മുനയില്‍ നിര്‍ത്തുന്നു... വളരെ ചെറിയൊരു കഥ അതിന്‍റെ അവതരണ ശൈലി കൊണ്ട് പ്രേക്ഷകരെ മുഴുവന്‍ വിസ്മയിപ്പിക്കുന്നതിന്റെ ഉത്തമ ഉദാഹരണമാണ് ഈ ചിത്രം... 

അനുഷ്ക ശര്‍മ്മ ചിത്രത്തിന്‍റെ നട്ടെല്ല് എന്ന്‍ പറയുന്നത് ഇവരുടെ അസാധ്യ പ്രകടനമാണ് പ്രണയം, ഭയം, ദുഖം, രോക്ഷം, തുടങ്ങിയ  ഭാവങ്ങള്‍ അതിന്‍റെ തീക്ഷണത ഒട്ടും തന്നെ ചോര്‍ന്ന്‍ പോവാതെ അവര്‍ സ്ക്രീനില്‍ അവതരിപ്പിച്ചപ്പോള്‍ തന്‍റെ കരിയറിലെ തന്നെ ഏറ്റവും മികച്ച പ്രകടന്നങ്ങളില്‍ ഒന്നാണ് അവര്‍ കാഴ്ചവെച്ചത്... ചിത്രത്തിന്‍റെ അവസാന രംഗങ്ങളിലെ അനുഷ്കയുടെ ഭാവപ്രകടന്നങ്ങള്‍ ഏറെ പ്രശംസ അര്‍ഹിക്കുന്നു... ഫാന്‍റം ഫിലിംസിനൊപ്പം ചേര്‍ന്ന്‍ ചിത്രത്തിന്‍റെ നിര്‍മ്മാണത്തിലും അനുഷ്ക പങ്കാളി ആയിട്ടുണ്ട്...

പൂര്‍ണമായും യഥാര്‍ത്ഥനിരൂപിതമായാണ് സംവിധയാകനായ Navdeep Singh ഈ ചിത്രം അണിയിചൊരുക്കിയിട്ടുള്ളത് അദ്ദേഹത്തിന്റെ ആദ്യ ചിത്രമാണിതെന്ന്‍ വിശ്വസിക്കാനെ സാധിക്കുന്നില്ല ഓരോ രംഗവും അത്രമാത്രം മികവുറ്റതായിരുന്നു വരും കാലങ്ങളില്‍ ഇദ്ദേഹത്തില്‍ നിന്നും മികച്ച ചിത്രങ്ങള്‍ പ്രേക്ഷകര്‍ക്ക് പ്രതീക്ഷിക്കാവുന്നതാണ്‌...

Arvind Kannabiran ഛായാഗ്രഹണ മികവിനെ എത്ര പ്രശംസിച്ചാലും മതിയാവില്ല അത്ര മനോഹരമായിട്ടാണ് അദ്ദേഹം ചിത്രത്തിലെ ഓരോ രംഗവും തന്‍റെ ക്യാമറയില്‍ പകര്‍ത്തിയിട്ടുള്ളത്... ഓരോ ഫ്രെമും വളരെ നാച്ചുറല്‍ ആയി നമുക്ക് അനുഭവപ്പെടുന്നു...

മറ്റൊന്ന്‍ Devobrat Chaliha യുടേം സംഘത്തിന്റെയും ശബ്ത മിശ്രണമാണ്  ചിത്രത്തിലേക്ക് പ്രേക്ഷകനെ കൂടുതല്‍ അടുപ്പിക്കുന്നതില്‍ വളരെ വലിയൊരു പങ്ക് തന്നെ അത് വഹിച്ചിട്ടുണ്ട് എന്ന്‍ നമുക്ക് പറയാന്‍ സാധിക്കുനതാണ്...

Sanjeev-Darshan, Bann Chakraborty, Abhirup Chand, Ayush Shrestha, Savera Mehta and Samira Koppikar എന്നിവരുടെ സംഗീതവും വളരെയധികം മികവു പുലര്‍ത്തന്നതായുരുന്നു...

എല്ലാ അര്‍ത്ഥത്തിലും വളരെ മികച്ചൊരു ത്രില്ലര്‍ ചിത്രമാണ് NH10 കാണാത്തവര്‍ എത്രയുംവേഗം തിയറ്ററില്‍ നിന്നും തന്നെ ഈ ചിത്രം കാണാന്‍ ശ്രമിക്കുക...

Wednesday, 25 February 2015

100.As One

As One "Ko-ri-a" (original title)  (2012) : A must watch Korean sports drama that based on real incidents.


Language: Korean
Genre: Drama | Sport
Director: Hyeon-seong Moon
Writers: Yeong-ah Yoo (screenplay), Seong-hwi Kwon (screenplay)
Stars: Ji-won Ha, Doona Bae, Ye-ri Han

കൊറിയ രണ്ടാം ലോക മഹായുദ്ധത്തിനു ശേഷം രണ്ടായി വിഭജ്ജിക്കപ്പെട്ട് ഇന്നും ശത്രുക്കളായി കഴിയുന്ന രാജ്യമാണ് എന്നാല്‍ ചരിത്രത്തില്‍ ഒരിക്കല്‍ നോര്‍ത്ത് കൊറിയയും, സൌത്ത് കൊറിയയും ഒന്നാവുകയുണ്ടായി 1991ല്‍ ജപ്പാനില്‍ നടന്ന ലോക ടേബിള്‍ ടെന്നീസ് ചാമ്പ്യന്‍ഷിപ്പില്‍ ആയിരുന്നു ഈ അത്ഭുതം സംഭവിച്ചത്...  ആ സംഭവത്തിന്‍റെ പശ്ചാത്തലത്തില്‍  2012ല്‍ Moon Hyun-sung അണിയിചൊരുക്കിയ സൌത്ത് കൊറിയന്‍ ചിത്രമാണ് As One...

1987 നവംബര്‍ 29ന് രണ്ട് നോര്‍ത്ത് കൊറിയന്‍ ഗവണ്മെന്റ് ഏജന്റ്സ് ഇറാക്കില്‍ നിന്നും സൌത്ത് കൊറിയയിലേക്ക് യാത്ര തിരിച്ച Korean Air Flight 858നെ  ബോംബ്‌ വെച്ച് തകര്‍ക്കുകയുണ്ടായി, 1988ല്‍ നടക്കാനിരിക്കുന്ന സിയോള്‍ ഒളിമ്പിക്സില്‍ ടീമുകള്‍ മത്സരിക്കാതിരിക്കാനാണ് നോര്‍ത്ത് കൊറിയ ഇങ്ങനെയൊരു ക്രൂര കൃത്യം നടത്തിയതെന്ന് പിന്നീടു കണ്ടെത്തുകയുണ്ടായി...  തുടര്‍ന്ന്‍ ഇരു രാജ്യങ്ങളുടെയും തലവന്മാര്‍ തമ്മിലുണ്ടായ സമ്മേളനത്തില്‍ ഇരു രാജ്യങ്ങളിലെയും ജനങ്ങള്‍ക്കിടയില്‍ ഉണ്ടായ ഭീതിയും മറ്റും അകറ്റുന്നതിനായി ഇരു രാജ്യങ്ങളിലെയും കായിക ടീമുകളെ ഒരുമിപ്പിക്കാന്‍ തീരുമാനിക്കുകയുണ്ടായി തുടര്‍ന്ന്‍ ഇരു രാജ്യങ്ങളിലും ഏറ്റവുമധികം പ്രചാരത്തിലുള്ള ടേബിള്‍ ടെന്നീസ് ടീമുകള്‍ ചരിത്രത്തില്‍ ആദ്യമായി കൊറിയ എന്ന ഒറ്റ നാമത്തില്‍ 1991ലെ ലോക ടെന്നീസ്  ചാമ്പ്യന്‍ഷിപ്പില്‍ പങ്കെടുക്കാനായി ജപ്പാനിലേക്ക് പോവുകയുണ്ടായി...

ഇകാലമത്രയും ജന്മശത്രുക്കളായി ഒരു ടേബിളിന് ഇരുവശത്തും നിന്നു മത്സരിച്ചവര്‍ ഇനി ഒന്നായി ഒരേ മനസ്സോടെ പോരാടിയെ തീരു... തങ്ങളുടെതായ സ്വപ്‌നങ്ങള്‍ പോലും മാറ്റി വെച്ച് തങ്ങളുടെ തുടര്‍ച്ചയായ ഒന്‍പതാമത്തെ ലോകകിരീടം ലക്ഷ്യമിട്ട് വരുന്ന ചൈനയെ എതിരിട്ടെ മതിയാകു...

എല്ലാ അര്‍ത്ഥത്തിലും ഒരു മികച്ച ചിത്രമാണ് As One. ഒരു സ്പോര്‍ട്സ് ഡ്രാമ എന്നതിനപ്പുറം യഥാര്‍ത്ഥ സംഭവങ്ങളെ അതിന്‍റെ തീക്ഷണത ഒട്ടും തന്നെ ചോര്‍ന്ന്‍ പോകാതെ  അവതരിപ്പിക്കാന്‍ കഴിഞ്ഞു എന്നതാണ് ഈ ചിത്രത്തിന്‍റെ മേന്മ...

കൊറിയയുടെ ചരിത്രത്തിലെ ഏറ്റവും വലിയ മുറിപ്പാടാണ് രണ്ടാം ലോക മഹായുദ്ധത്തിനു ശേഷമുണ്ടായ രാജ്യത്തിന്‍റെ വിഭജനം... അന്ന് മുതല്‍ ഇന്ന്‍ വരെയും രണ്ടായി തന്നെ നില്‍ക്കുന്ന ഈ രാഷ്ട്രം ഒരിക്കല്‍ ഒന്നിച്ച  ലോക ടെന്നീസ്  ചാമ്പ്യന്‍ഷിപ്പിലെ അവിസ്മരണീയ മുഹൂര്‍ത്തങ്ങളെയും, അന്നത്തെ കളിക്കാരുടെ മാനസിക സംഘര്‍ഷങ്ങളെയും, ഇരു രാജ്യങ്ങളിലെയും ഗവണ്മെന്റിന്റെ ചേതികളെയും എല്ലാം വളരെ മികച്ച രീതിയില്‍ തന്നെ കോര്‍ത്തിണക്കി പ്രേക്ഷകനു മുന്നിലെത്തിക്കാന്‍ സംവിധായകനായ Hyeon-seong Moon സാധിച്ചിട്ടുണ്ട്... ചിത്രത്തിന്‍റെ അവസാന രംഗങ്ങളിലെ നിമിഷങ്ങള്‍ ഒരിക്കലും മറക്കാന്‍ കഴിയില്ല അത്രയ്ക്ക് തീക്ഷണത നിറഞ്ഞതായിരുന്നു ആ രംഗങ്ങള്‍... ഇതിനെല്ലാം ഇടയിലും ടേബിള്‍ ടെന്നീസ് എന്ന കായിക ഇനം നന്നായി ആസ്വദിക്കാനും ഈ ചിത്രത്തിലുടെ നമുക്ക് സാധിക്കുന്നു എന്നത് എടുത്ത് പറയേണ്ട കാര്യമാണ്...

Ha Ji-won കൊറിയന്‍ ടേബിള്‍ ടെന്നിസിന്‍റെ സുവര്‍ണകാലത്തെ കിരീടം വെക്കാത്ത രാജ്ഞിയായിരുന്ന Hyun Jung-hwa ആയി തന്‍റെ കരിയറിലെ ഏറ്റവും മികച്ച പ്രകടനങ്ങളില്‍ ഒന്നാണ് കാഴ്ചവെച്ചിരികുന്നത്... അതുപോലെ Ri Bun-hui ആയുള്ള Bae Doona യുടെ പ്രകടനവും എടുത്ത് പറയേണ്ട ഒന്നാണ്... ചിത്രത്തിലെ മറ്റ് കഥാപാത്രങ്ങളെ അവതരിപ്പിച്ച ഓരോരുത്തരും മികച്ച പ്രകടനങ്ങള്‍ തന്നെയാണ് കാഴ്ചവെച്ചിട്ടുള്ളത്‌ എങ്കിലും  Ha Ji-won ന്‍റെയും Bae Doonaയുടെയും പ്രകടന്നങ്ങള്‍ പ്രത്യേകം പ്രശംസ അര്‍ഹിക്കുന്നു...

എടുത്ത് പറയേണ്ട മറ്റൊന്ന്‍ ചിത്രീകരണത്തിന് മുന്‍പ് അഭിനയതാക്കള്‍ എല്ലാവരും തന്നെ ടേബിള്‍ ടെന്നീസ് 4 മാസത്തോളം പരിശീലിക്കുകയുണ്ടായി അതിനിവരെ സഹായിചതാവട്ടെ അവര്‍ അവതരിപ്പിക്കുന്ന കഥാപാത്രങ്ങളുടെ യഥാര്‍ത്ഥത്തില്‍ ജീവിച്ചിരിക്കുന്ന വെക്തികള്‍ തന്നെ...

ചുരുക്കത്തില്‍ ഏതൊരു സിനിമ പ്രേമിയും തീര്‍ച്ചയായും കണ്ടിരിക്കേണ്ട ചിത്രമാണിത്...

More Reviews @ prakashamparathunnavan.blogspot.in